Umuhanzi w’icyamamare muri Nigeria, Davido, yagaragaje urukundo n’ubucuti afitanye na mugenzi we Mayorkun amugenera impano y’imodoka y’amashanyarazi yo mu bwoko bwa Tesla Cybertruck, ifite agaciro kari hagati ya $69,000 na $100,000 bitewe n’ubwoko bwayo.
Ku wa 26 Nyakanga 2026, Davido yashyize ku rubuga rwa Instagram ifoto y’iyo modoka, ayiherekesha ubutumwa bugufi bwatunguranye bwari bugenewe Mayorkun.
“akira imano,mayorkun.ndagukunda. wihangane iakugeraho ejo.”
Nyuma y’ubu butumwa, Mayorkun nawe yahise agaragaza ibyishimo bye abinyujije mu butumwa bwa Instagram bumara amasaha 24, ashimira Davido ku mpano y’agaciro yamugeneye.
Nubwo Mayorkun atakibarizwa mu nzu ireberera inyungu z’abahanzi ya Davido Music Worldwide (DMW), bombi bakomeje kubungabunga ubucuti bwabo. Mayorkun yinjiye muri DMW mu 2016, ayivamo mu 2021 ku bwumvikane bw’impande zombi nyuma yo kumurika album ye The Mayor of Lagos mu 2018.
Nyuma yo kuva muri DMW, Mayorkun yakomeje urugendo rwe rwa muzika yifatanya na Sony Music West Africa.
Imodoka ya Tesla Cybertruck, ikorwa na Tesla, yatangiye kugurishwa ku isoko nyuma yo kumurikwa ku mugaragaro mu 2023. Yamenyekanye cyane kubera imiterere yayo yihariye n’ikoranabuhanga rigezweho, aho ibiciro byayo bitandukana bitewe n’ubwoko bwatoranyijwe n’umuguzi.
Iyi mpano yongeye kwerekana ko n’ubwo Davido na Mayorkun batagikorana mu buryo bw’akazi nk’uko byahoze, ubucuti n’icyizere bafitanye bikomeje gukomera.
