Rutahizamu wa Al Nassr n’ikipe y’igihugu ya Portugal, Cristiano Ronaldo, yambitswe umwitero w’icyubahiro uzwi nka Bisht, umeze nk’uwo Lionel Messi yambitswe nyuma yo kwegukana Igikombe cy’Isi cya 2022 cyabereye muri Qatar.
Ibi byabaye nyuma y’uko Al Nassr itsinze Al Hazem ibitego 4-0 mu mukino wa shampiyona ya Arabia Saudite wabaye ku munsi w’ejo. Ronaldo yatsinzemo ibitego bibiri, ahita agera ku bitego 964 amaze gutsinda mu mwuga we wose, akomeza kwegera intego yo kugera ku bitego 1000.
Nyuma y’umukino, ubuyobozi bw’ikipe n’abari ku kibuga bamwambitse uyu mwitero usanzwe wambarwa mu bihe by’icyubahiro mu bihugu byo mu Burasirazuba bwo Hagati birimo Arabia Saudite, Qatar, Leta Zunze Ubumwe z’Abarabu na Kuwait. Uyu mwambaro ukorwa mu bwoya bw’inyamaswa zirimo ingamiya, ukarimbishwa imitako ya zahabu, kandi ukaba ikimenyetso cy’icyubahiro n’igitinyiro.
Mu 2022, Messi yambitswe umwitero nk’uwo na Emir wa Qatar nyuma yo gufasha Argentina kwegukana Igikombe cy’Isi, igikorwa cyavuzweho cyane ku rwego mpuzamahanga.
Intsinzi ya Al Nassr yatumye iguma ku mwanya wa mbere ku rutonde rwa shampiyona, irusha Al Hilal inota rimwe, mu gihe shampiyona igikomeje.
Kwamamaza amafoto ya Ronaldo yambaye uyu mwitero byakwirakwijwe ku mbuga nkoranyambaga, aho benshi babigereranyije n’ibyabaye kuri Messi mu 2022.
