Perezida wa Repubulika y’u Rwanda, Paul Kagame, yashimiye ikipe ya Arsenal nyuma yo kugera ku mukino wa nyuma wa UEFA Champions League 2025–2026, anayifuriza kuzegukana igikombe.
Ibi yabitangaje nyuma y’umukino wa 1/2 wo kwishyura wahuje Arsenal na Atlético Madrid wabaye ku wa Kabiri nijoro. Umukino ubanza wari warangiye amakipe yombi anganya igitego 1-1, ariko uwo kwishyura urangira Arsenal itsinze igitego 1-0 cyatsinzwe na Bukayo Saka ku munota wa 45.
Iyi ntsinzi yahesheje Arsenal kugera ku mukino wa nyuma ku giteranyo cy’ibitego 2-1, isezerera Atlético Madrid, inabona itike yo kongera gukina umukino wa nyuma w’iri rushanwa rikomeye ku mugabane w’u Burayi, iherukagaho mu 2006.
Perezida Kagame, wabonye umukino ubanza, yashimye urwego rw’imikinire y’aya makipe yombi asanzwe afitanye ubufatanye na gahunda ya Visit Rwanda. Abinyujije ku rubuga rwa X, yavuze ko wari umukino mwiza, anashimira Arsenal ku ntsinzi yayo.
Yagize ati: “Umukino mwiza hagati y’amakipe akorana na Visit Rwanda, Atlético Madrid na Arsenal. Turashimira Arsenal ku ntsinzi no kugera ku mukino wa nyuma wa UEFA Champions League. Ikipe nziza y’umufatanyabikorwa wa Visit Rwanda nitsinde.”
Arsenal igeze ku mukino wa nyuma ifite amateka adasanzwe muri iri rushanwa ry’uyu mwaka, aho mu mikino 14 yakinnye itigeze itsindwa na rimwe. Yinjijwemo ibitego 6 gusa, mu gihe mu mikino 9 itinjijwe igitego na kimwe, bigaragaza ubudahangarwa bwayo mu bwugarizi.
Ku mukino wa nyuma, Arsenal izahura n’izava hagati ya FC Bayern Munich na Paris Saint-Germain, mu mukino utegerejwe n’abatari bake ku Isi.
Abakunzi b’umupira w’amaguru, cyane cyane aba Arsenal, bakomeje kwizera ko iyi kipe ishobora kwandika amateka mashya yegukana igikombe cya UEFA Champions League ku nshuro ya mbere.
