Ku Cyumweru cya Pasika, abakunzi b’umuziki wo kuramya no guhimbaza Imana bahuriye mu nyubako ya BK Arena mu gitaramo cyiswe “Easter Jubilee Music Gathering”, cyateguwe mu rwego rwo kwizihiza Pasika binyuze mu ndirimbo n’ijambo ry’Imana. Iki gitaramo cyaranzwe n’imbaga y’abantu benshi bacyitabiriye, bigaragaza ko umuziki wa Gospel ukomeje gukura no gukundwa mu Rwanda.
Ben na Chance, bari bategerejwe cyane, ni bo bayoboye iki gitaramo. Ku nshuro yabo ya mbere bakoreye muri iyi nyubako, bagaragaje imbaraga n’ubuhanga mu kuramya no guhimbaza Imana, ibintu byashimishije abitabiriye. Indirimbo zabo zakunzwe n’abenshi, aho imbaga yose yafatanyije nabo mu kuririmba no guhimbaza.
Iki gitaramo cyanagaragayemo abahanzi bakizamuka barimo Alicia na Germaine, abahanzikazi bavukana batangiye kugaragaza izina mu muziki wa Gospel. Ku nshuro yabo ya mbere baririmbiye imbaga nini, bagaragaje impano yabo mu ndirimbo zitandukanye zakiriwe neza n’abari bitabiriye.
Mu rwego rwo guhuza indirimbo n’ijambo ry’Imana, abitabiriye iki gitaramo bahawe ubutumwa bwibanze ku kwizera no guhinduka, bwatanzwe na Pastor Julienne Kabanda. Ubu butumwa bwatumye benshi mu bitabiriye bafata umwanya wo kwisuzuma, bamwe biyemeza gutangira ubuzima bushya, abandi bafata imyanzuro yo gukomeza urugendo rwabo rwo kwizera.
Abandi bahanzi barimo Papi Clever na Dorcas hamwe na Pastor Ngoga Christophe na bo bagaragaje umusanzu wabo, baririmba indirimbo zabo zakunzwe, bakomeza kuzamura amarangamutima y’abitabiriye.
Muri rusange, iki gitaramo cya Pasika cyabaye umwanya wihariye wo kuramya no guhimbaza Imana, kikaba n’intambwe ikomeye ku muziki wa Gospel, aho abahanzi bagaragaje ko bashobora kuzuza inyubako nini no gutanga ubutumwa bugera ku bantu benshi.
Ben na Chance bakoreye igitaramo mbaturamugabo muri BK Arena
