kipe ya Real Madrid yitwaye neza cyane itsinda Manchester City ibitego 3-0 mu mukino ubanza wa 1/8 cy’irangiza mu irushanwa rya UEFA Champions League, umukino wabereye kuri Santiago Bernabeu kuri uyu wa Gatatu nijoro.
Uyu mukino wari utegerejwe na benshi watangiye amakipe yombi yigana cyane hagati mu kibuga. Gusa uko iminota yagendaga ishira Manchester City yatangiye kugerageza gusatira izamu rya Real Madrid binyuze ku bakinnyi barimo Jeremy Doku.
Ku munota wa 19 w’umukino, Real Madrid yafunguye amazamu ku mupira muremure watewe n’umunyezamu Thibaut Courtois. Uwo mupira wahuye na Federico Valverde wahise acenga umunyezamu wa Manchester City awushyira mu nshundura.
Nyuma y’icyo gitego, Real Madrid yakomeje kugaragaza imbaraga nyinshi mu mukino. Ku munota wa 27, Federico Valverde yongeye gutsinda igitego cya kabiri ahawe umupira na Vinicius Junior.
Manchester City yagerageje gusubira mu mukino, ariko ku munota wa 42 Federico Valverde yongeye kunyeganyeza inshundura atsinda igitego cya gatatu cya Real Madrid ndetse aba yujuje ibitego bitatu (Hat-trick) muri uyu mukino.
Mu gice cya kabiri, amakipe yombi yakoze impinduka mu bakinnyi. Manchester City yasimbuje Tijan Reijnders hajyamo Savinho, naho Real Madrid ikuramo Ferland Mendy hinjiramo Fran Garcia.
Ku munota wa 58, Real Madrid yabonye penaliti nyuma y’ikosa Gianluigi Donnarumma yakoreye Vinicius Junior. Vinicius ni we wayiteye ariko umunyezamu wa Manchester City arayikuramo.
Manchester City yakomeje gushaka uko yabona igitego cyo kwishyura ariko biranga, umukino urangira Real Madrid itsinze ibitego 3-0.
Mu yindi mikino yabaye kuri uyu munsi, Arsenal yanganyije na Bayer Leverkusen igitego 1-1, Bodoe/Glimt itsinda Sporting ibitego 3-0, mu gihe Paris Saint-Germain yatsinze Chelsea ibitego 5-2.
Real Madrid ibonye intsinzi ikomeye izayifasha kujya mu mukino wo kwishyura ifite amahirwe menshi yo kugera muri 1/4 cy’irangiza cya UEFA Champions League.
