Umunyamideli n’umunyamideri w’Umunyarwanda Pamella yatangaje ko yahaye amasaha 24 abantu bose bakwirakwije ibihuha bimwerekeyeho ku mbuga nkoranyambaga, by’umwihariko ibijyanye n’umubano we na The Ben, kugira ngo babe babisibye bitaba ibyo akagana inzego z’ubutabera.

Ibi Pamella yabigarutseho mu butumwa yashyize kuri konti ye ya Instagram nyuma y’iminsi myinshi hacicikana amakuru avuga ko we na The Ben batakibanye neza ndetse hakavugwa n’ibindi bihuha ku buzima bwabo bwite.

Yavuze ko atari umuntu usanzwe ashyira ubuzima bwe bwose ku mbuga nkoranyambaga, kandi ko imyaka myinshi ishize yarahitamo guceceka ku makuru amuvugwaho kuko yumvaga nta muntu agomba ibisobanuro ku buzima bwe.

Ati: “Igihe kirageze cyo kurinda izina ryanjye gukomeza gusigwa icyasha n’abantu batanzi.”

Pamella yavuze ko abantu bose bakwirakwije ayo makuru bafite amasaha 24 yo kuba bayasibye ku mbuga nkoranyambaga, bitaba ibyo akazatanga ikirego mu nzego zibishinzwe kugira ngo bakurikiranwe n’amategeko.

Yashimangiye ko hari abantu bake bagomba kubera abandi urugero mu gukoresha imbuga nkoranyambaga neza no kubaha ubuzima bwite bw’abandi. Yanavuze ko ari ubwa mbere n’ubwa nyuma agize icyo avuga kuri iki kibazo, asobanura ko nyuma y’aho azareka amategeko agakora akazi kayo.

Iri tangazo ryakuruye impaka nyinshi ku mbuga nkoranyambaga, aho bamwe bashyigikiye icyemezo cye cyo kurinda icyubahiro cye, mu gihe abandi bakomeje gukurikirana amakuru ajyanye n’umubano we na The Ben.

Kugeza ubu, The Ben ntabwo aragira icyo atangaza ku magambo ya Pamella cyangwa ku bihuha bimaze iminsi bivugwa ku mubano wabo