Umuhanzikazi w’icyamamare ku rwego mpuzamahanga, Doja Cat, ategerejwe i Kigali mu gitaramo gikomeye cya Move Afrika kizabera muri BK Arena ku wa 17 Werurwe 2026. Iki gitaramo kizaba igice cy’urugendo mpuzamahanga rugamije guteza imbere ubukungu bushingiye ku muziki n’iterambere ry’ubuhanzi muri Afurika.
Doja Cat azataramira bwa mbere i Kigali mbere yo gukomereza muri Pretoria muri Afurika y’Epfo ku wa 20 Werurwe 2026. Uru rugendo rwerekana icyerekezo cya Move Afrika cyo gushyiraho urwego rushya rw’ibitaramo binini byateguwe kandi bigakorwa n’abanyafurika.
Doja Cat, amazina ye nyakuri akaba Amala Ratna Zandile Dlamini, yavukiye i Los Angeles muri Leta Zunze Ubumwe za Amerika ku wa 21 Ukwakira 1995, afite inkomoko muri Afurika y’Epfo ku ruhande rwa se. Iyi mizi ye ni yo akunda kugarukaho mu biganiro bye, agaragaza ishema ryo kuba umunyafurika ku rwego mpuzamahanga.
Yatangiye kumenyekana cyane mu 2018 nyuma yo gusohora indirimbo “Mooo!”, yakwirakwiye cyane ku mbuga nkoranyambaga. Mu 2019 yasohoye album Hot Pink, yarimo indirimbo “Say So” yamugejeje ku mwanya wa mbere wa Billboard Hot 100 ikanamuha igihembo cya Grammy Award.
Mu 2021 yasohoye Planet Her, album yakunzwe cyane ku isi hose, irimo indirimbo “Kiss Me More” yakoranye na SZA. Mu 2023 yasohoye Scarlet, album yagaragaje impinduka mu njyana ye, yegera cyane Hip-Hop, igaragaza Doja Cat mu buryo bushya kandi bwimbitse.
Doja Cat azwi cyane ku mubyinire ye, imyambarire idasanzwe no gukoresha imbuga nkoranyambaga mu buryo bwihariye, ibintu byamufashije kubaka izina rikomeye mu rubyiruko rwo ku isi yose.
Igitaramo cya Move Afrika 2026 kizabera i Kigali ntikizaba igitaramo gusa, ahubwo kizaba igikorwa cyagutse gihuza umuziki, imirimo n’ishoramari. Abahanzi, abakozi b’ibitaramo n’abashoramari bo mu Rwanda bazahabwa amahirwe yo gukorana n’inzego mpuzamahanga, bityo urwego rw’imyidagaduro mu gihugu rukomeze gutera imbere.
U Rwanda ruzaba rumaze kwiyongera ku rutonde rw’ibihugu byakira ibitaramo mpuzamahanga bikomeye, bikarushyira ku ikarita y’isi nk’igihugu gifite ubushobozi bwo kwakira no gutegura ibikorwa by’umuco ku rwego rwo hejuru.
