Umukino wahuje Arsenal na Atletico Madrid warangiye amakipe yombi anganyije igitego 1-1, mu mukino wakurikiwe n’abarimo Perezida wa Repubulika y’u Rwanda, Paul Kagame.
Atletico Madrid yatangiye umukino iri imbere y’abafana bayo, igerageza gusatira hakiri kare no kwiharira umupira. Nubwo byari bimeze gutyo, Arsenal nayo ntiyatinze kwerekana ko ishobora kugera imbere y’izamu.
Ku munota wa 5, Arsenal yabonye uburyo bukomeye bwashoboraga kuvamo igitego, aho Noni Madueke yahinduye umupira mwiza, ariko ishoti rya Piero Hincapié riranyura ku ruhande gato rw’izamu.
Ku munota wa 14, David Raya yakijije Arsenal igitego cyari cyabazwe, akura umupira ku ishoti rikomeye rya Julián Álvarez awushyira muri koruneri.
Amakipe yombi yakomeje gusatirana, ariko Arsenal ikajya igera imbere y’izamu rya Atletico Madrid kenshi. Noni Madueke yongeye kugerageza ishoti rikomeye ariko umupira unyura hanze gato cyane.
Mbere gato y’uko igice cya mbere kirangira, ku munota wa 44, Arsenal yabonye penaliti ku ikosa ryakorewe Viktor Gyökeres. Uyu mukinnyi yahise ayitera neza ayinjiza mu izamu, igice cya mbere kirangira Arsenal iyoboye n’igitego 1-0.
Mu gice cya kabiri, Atletico Madrid yagarutse ishaka kwishyura. Ku munota wa 56, iyi kipe yabonye penaliti nyuma y’uko Ben White akoze umupira ari mu rubuga rw’amahina.
Julián Álvarez ni we wayiteye ayinjiza neza, amakipe yombi anganya 1-1.
Nyuma yo kwishyura, Atletico Madrid yakomeje gusatira cyane ishaka igitego cya kabiri, aho Antoine Griezmann yarekuye ishoti rikomeye ariko rikubita igiti cy’izamu.
Arsenal yakoze impinduka ishyiramo abakinnyi barimo Bukayo Saka na Eberechi Eze mu rwego rwo gushaka igitego cy’intsinzi, ariko birangira kitabonetse.
Umukino warangiye amakipe yombi anganyije 1-1, mu mukino waranzwe n’ishyaka n’imbaraga ku mpande zombi.
