Abakunzi b’imyidagaduro n’abakora mu rwego rw’uburezi muri Nigeria bari mu gahinda nyuma y’urupfu rw’umukinnyi w’inararibonye ndetse n’umwarimu muri kaminuza, Professeur Adekola Akangbe Gabriel Oyewo, wamamaye cyane ku izina rya Professeur Kola Oyewo.
Yari afite imyaka 80 y’amavuko.Inkuru y’urupfu rwe yatangajwe ku wa Gatanu n’umuhungu we, Adetoyese Oyewo, abinyujije mu butumwa yashyize ku rubuga rwa Facebook, aho yashimiye ubuzima n’ibikorwa byaranze se.Mu butumwa bwe, Adetoyese yavuze ko se yari umuntu waranzwe n’“urukundo, ubwenge, imbaraga n’ubugwaneza,” agaragaza agahinda gakomeye yatewe no kumubura.
Yagize ati: “N’umutima uremerewe ni bwo mbamenyesha urupfu rwa data nkunda cyane.”Yavuze ko nubwo umuryango uri mu kababaro, ushimira Imana ubuzima Professeur Oyewo yabayeho ndetse n’uruhare rukomeye yagize mu buzima bw’abantu benshi.Yakomeje avuga ko umurage wa nyakwigendera uzakomeza kubaho binyuze mu bikorwa bye ndetse no mu rwibutso asigiye abo mu muryango, inshuti, abo bakoranye n’abamukunze, bose bagizweho ingaruka nziza n’ubuzima bwe.
Adetoyese yasabye abantu gukomeza gusengera no gushyigikira umuryango muri iki gihe cy’icyunamo, avuga ko bari kwizihiza ubuzima bw’umuntu wari wariyeguriye umurimo, ubumenyi n’ubuhanzi.Professeur Kola Oyewo yari azwi cyane nk’umwe mu bantu bafite izina rikomeye mu ikinamico no mu buhanzi bwo gukina amakinamico muri Nigeria. Yubahwaga cyane nk’umukinnyi wabigize umwuga ndetse n’umwarimu w’inararibonye.
Mu myaka myinshi yamaze mu mwuga, yagize uruhare runini mu guteza imbere no kubungabunga ikinamico y’umuco w’Abayoruba, anagira uruhare mu kumenyekanisha umuco wa Nigeria binyuze mu bikorwa bye ku rubyiniro, muri filime ndetse no mu burezi.Umwuga we wari ugizwe no gukina, kwigisha no guteza imbere umuco, ibintu byatumye aba umwe mu bagize uruhare rukomeye mu iterambere ry’ubuhanzi bw’ikinamico muri Nigeria.
