Ibihembo bya 68th Grammy Awards byabereye i Los Angeles byahinduye amateka ku muziki wa Afurika, aho abahanzi bayo bagaragaje ko ijwi ryabo rikomeje kwigarurira isi.
Ikintu cyabaye amateka ni uko Fela Anikulapo Kuti, umubyeyi wa Afrobeat, yahawe Grammy Lifetime Achievement Award, aba abaye umuhanzi wa mbere wo muri Afurika uhawe iki gihembo cy’icyubahiro. Nubwo yitabye Imana, abana be barimo Femi Kuti na Yeni Kuti ni bo bakiriye iki gihembo ku izina rye, bashimira umurage akomeje gusiga mu muziki no mu muco wa Afurika.
Mu bihembo byatanzwe ku cyumweru, Tyla wo muri Afurika y’Epfo yongeye kwandika amateka ubwo yatsindiraga igihembo cya Best African Music Performance kubera indirimbo ye “Push 2 Start.” Ibi byamugize uwatsinze iki gihembo inshuro ebyiri, nyuma yo kugikora bwa mbere mu 2024. Yari ahanganye n’abahanzi bakomeye barimo Burna Boy, Davido, Ayra Starr, Wizkid, ndetse na Eddy Kenzo, bikagaragaza ko icyiciro cyari gikomeye cyane.
Shaboozey, umuhanzi ukomoka muri Nigeria uba muri Amerika, na we yari mu bishimiwe cyane muri ayo marushanwa. Yegukanye Grammy ya mbere mu cyiciro cya Best Country Duo/Group Performance kubera indirimbo “Amen” yakoranye na Jelly Roll. Mu ijambo rye, yashimiye umubyeyi we ndetse ashimangira uruhare rw’abimukira mu kubaka Leta Zunze Ubumwe za Amerika.
Nubwo abahanzi nka Angélique Kidjo, Youssou N’Dour na Burna Boy batabonye ibihembo muri uyu mwaka, ubwitabire n’uruhare rwa Afurika muri Grammy 2026 byari bigaragara cyane, bikomeza kwerekana ko umuziki w’umugabane ukomeje kugenda uhabwa agaciro ku rwego mpuzamahanga.
