Patrick Tse, umwe mu bakinnyi ba filime bubatse amateka muri sinema ya Hong Kong, yitabye Imana ku myaka 89 y’amavuko nyuma y’imyaka isaga 70 yari amaze mu ruganda rwa sinema.
Urupfu rwe rwatangajwe n’umuhungu we Nicholas Tse, na we uzwi cyane mu muziki no gukina filime, wavuze ko umuryango wifuza ko abantu bamwibuka ku isura nziza no ku byishimo yabasigiye aho kumuririra gusa.
Mu butumwa yashyize ku mbuga nkoranyambaga, Nicholas Tse yagize ati: “N’agahinda kenshi, ndatangaza ko papa wanjye Patrick Tse yitabye Imana. Iyo mutekereje Sei Gor, mutekereza papa. Ntimugire agahinda cyangwa amarira menshi, ahubwo twifuza kugumana ishusho ye nziza iteka ryose, duhora twishimira ibyo yakoze n’ibyiza yadusigiye.”
Ibinyamakuru byo muri Hong Kong byatangaje ko Patrick Tse yapfuye ari iwe mu rugo, nyuma y’igihe yari amaze ahanganye n’ibibazo by’ubuzima bijyanye n’imyaka ye.
Nk’uko byatangajwe n’ibitangazamakuru byo muri Hong Kong, Nicholas Tse yahise ava mu bikorwa by’ibitaramo bya Evolution Nic Live asubira iwabo kugira ngo yite ku mihango yo gushyingura se. Mushiki we Jennifer Tse Ting Ting na we wibera muri Canada, yahise ajya muri Hong Kong.
Patrick Tse yari amaze igihe atagaragara cyane mu ruhame. Mu mpera za Mata 2026, yagaragaye ahuye n’inshuti ze basangira ikawa, aho amashusho yamugaragaje ari mu kagare k’abafite ubumuga ndetse agaragara nk’uwatakaje ibiro cyane.
Uyu mukinnyi w’amafilime yasize amateka akomeye muri sinema ya Hong Kong. Mu 2022, yatsindiye igihembo cy’umukinnyi mwiza mu bihembo bya Hong Kong Film Awards kubera uruhare rwe muri filime Time. Icyo gihe yabaye umwe mu bantu bakuze kurusha abandi batwaye icyo gihembo.
Time ni yo filime ya nyuma yakinnyeho mbere yo gusezera burundu muri sinema. Yatangiye gukina filime afite imyaka 16 mu 1952, kuva icyo gihe agaragara muri filime nyinshi zakunzwe muri Aziya.
Mu myaka yamaze muri sinema, Patrick Tse ntiyari umukinnyi gusa kuko yanandikaga akanayobora filime. Mu bikorwa byamumenyekanishije harimo The Strange Case of Three Wives, The Black Rose na The Story of a Discharged Prisoner yo mu 1967.
Urupfu rwe rwababaje benshi mu ruganda rwa sinema, barimo Jackie Chan wamwunamiye avuga ko Patrick Tse yari umwe mu bantu bamufashije kumenya byinshi ku myitwarire n’umwuga wo gukina filime.
Patrick Tse asize umurage ukomeye muri sinema ya Hong Kong, aho azibukwa nk’umwe mu bantu bagize uruhare mu kuyubaka no kuyimenyekanisha ku rwego mpuzamahanga.
