Ikipe ya FC Barcelona yegukanye Igikombe cya Shampiyona y’Icyiciro cya Mbere muri Espagne, La Liga 2025/2026, nyuma yo gutsinda mukeba wayo Real Madrid ibitego 2-0 mu mukino wa El Clásico wabereye kuri Spotify Camp Nou, ku Cyumweru tariki ya 10 Gicurasi 2026.
Uyu mukino wari uw’Umunsi wa 35 wa La Liga, aho FC Barcelone yasabwaga nibura kunganya kugira ngo ihite yegukana igikombe cya 29 cya shampiyona mu mateka yayo.
Abakinnyi ba FC Barcelone batangiye umukino bafite imbaraga nyinshi imbere y’abafana babo, maze ku munota wa cyenda gusa, rutahizamu Marcus Rashford afungura amazamu atsinda igitego cyiza kuri coup-franc.
Iki gitego cyabaye icya mbere FC Barcelone itsinze kuri coup-franc mu mukino wa El Clásico kuva Lionel Messi yabikora mu 2012.
Ku munota wa 18, Ferran Torres yatsinze igitego cya kabiri nyuma yo guhabwa umupira mwiza na Dani Olmo, ibintu byarushijeho gushyira abafana ba Barça mu byishimo.
Nyuma yo gutsindwa ibi bitego hakiri kare, Real Madrid yagerageje gusatira ishaka uko yakwishyura, ariko uburyo butandukanye yabonye ntibwagira icyo butanga. Mu gice cya mbere, Gonzalo García yahushije uburyo bwari bwabazwe.
Igice cya kabiri cyaranzwe n’imbaraga nyinshi n’ishyaka ku mpande zombi, ndetse cyabonetsemo amakarita atanu y’umuhondo. Ku munota wa 64, Vinícius Júnior yabonye uburyo bwiza bwo gutsinda, ariko umunyezamu wa FC Barcelone awukuramo neza.
Umukino warangiye FC Barcelone itsinze Real Madrid ibitego 2-0, ihita yegukana Igikombe cya La Liga cya 2025/2026 habura imikino itatu ngo shampiyona irangire.
Kugeza ubu, Barça ifite amanota 91 ku mwanya wa mbere, mu gihe Real Madrid ya kabiri ifite amanota 77.
Iyi ni inshuro ya mbere mu mateka ya La Liga igikombe gitwariwe mu mukino wa El Clásico uhuza aya makipe y’amakeba akomeye muri Espagne.
