Imikino y’Igikombe cy’Isi cy’Amakipe (FIFA Club World Cup) yakomeje ku wa Gatandatu tariki ya 29 Kamena 2025, aho amakipe ane yari ahanzwe amaso yahataniraga kubona itike ya ¼. Iyi mikino yabereye muri Leta Zunze Ubumwe za Amerika, kuri stade za Mercedes-Benz Stadium i Atlanta no kuri Hard Rock Stadium iri Miami Gardens.

Mu mikino yabaye, ikipe ya Paris Saint-Germain yo mu Bufaransa yasezereye Inter Miami yo muri Leta Zunze Ubumwe za Amerika, iyitsinda ibitego 4-0. Na ho Bayern Munich yo mu Budage yirukanye Flamengo yo muri Brésil iyitsinze 4-2.

PSG yihanije Inter Miami imbere ya Messi

Umukino wabimburiye indi wabereye i Atlanta, aho PSG yagaragaje ubuhanga budasanzwe itsinda Inter Miami ibitego bine mu gice cya mbere cy’umukino.

João Neves ni we wafunguye amazamu ku munota wa 6 ndetse anatsinda igitego cya kabiri ku wa 39. Igitego cya gatatu cyaturutse kuri Tomas Avilés, myugariro wa Inter Miami, witsinze ku munota wa 44. Achraf Hakimi ni we washyizeho igitego cya kane ku munota wa gatatu w’inyongera ku gice cya mbere.

Inter Miami yari iyobowe na Lionel Messi, ariko ntiyabashije guhagarika ubukana bwa PSG bwagaragaraga ko bwarushaga kure ikipe yo muri Amerika.

Bayern Munich yirukanye Flamengo mu mukino w’ishiraniro

Ku rundi ruhande, Bayern Munich na Flamengo bakinnye umukino wa kabiri wakiniwe kuri Hard Rock Stadium. Uyu mukino wari ukomeye cyane, ariko Bayern Munich ni yo yihariye igice cya mbere.

Ku munota wa 6, Erick Pulgar wa Flamengo yitsinze igitego, nyuma y’iminota itatu gusa Harry Kane yatsinze icya kabiri cya Bayern. Gerson yagaruye icyizere cya Flamengo ku munota wa 39, ariko Leon Goretzka yongera igitego cya gatatu ku munota wa 41.

Igice cya kabiri cyatangiye Flamengo ishaka kwishyura, aho Jorginho yatsinze igitego cya kabiri. Gusa Harry Kane yongeye kwigaragaza atsindira Bayern Munich igitego cya kane cyasoje umukino ari 4-2.

Bayern Munich vs PSG: Imbunda zirahurira i Miami

Ibi byatumye Paris Saint-Germain na Bayern Munich zibonera itike yo gukina ¼ cy’irangiza, aho zizahurira mu mukino ukomeye uteganyijwe ku wa Gatandatu, tariki 5 Nyakanga 2025.

Ni umukino witezweho byinshi, ugiye guhuza ibihangange byombi ku rwego mpuzamahanga. Amatiku y’uyu mukino yitezwe kuba menshi, aho abakinnyi nka Kylian Mbappé, João Neves, Hakimi bazacakirana n’abandi nka Harry Kane, Jamal Musiala, Goretzka.

Abakunzi b’umupira w’amaguru biteze umukino w’umuriro, ushobora kuzagaragaza ikipe iri kurusha izindi kwitwara neza muri iri rushanwa rikomeye rihuza amakipe yitwaye neza ku migabane.