Urwego rw’indege rwa Leta Zunze Ubumwe za Amerika (FAA) ruratangaza ko ibikoresho bigenzura imigendekere ya lisansi mu ndege za Boeing bifite umutekano, nubwo byagaragaye mu iperereza ry’ibanze ry’impanuka y’indege ya Air India yahitanye abantu 260 muri Kamena.
Umutekano w’izi ‘fuel switches’ wagaragaye nk’ikibazo gikomeye nyuma y’itangazwa ry’inkuru y’agateganyo y’iperereza yakozwe ku mpanuka yabaye kuri Flight 171 yerekeza i Londres, aho indege ya Boeing 787-8 Dreamliner yahanutse ikigurutse ivuye ku kibuga cya Ahmedabad.

Iyo nkuru yavuze ko moteri za Boeing zahagaritswe vuba na bwangu nyuma yo guhaguruka, bikaba byaratewe no guhagarikwa kwa lisansi yinjira muri moteri. Byongeye, hari raporo za FAA zo mu 2018 zasabaga kugenzura niba izi switches zifite uburyo bwo kwifunga kugira ngo zitimurwa impanuka itabaye.
Mu butumwa bwo kuri email BBC yabonye, umuyobozi mukuru wa Air India, Campbell Wilson, yasabye abantu kudakurura umwanzuro wihuse kuko iperereza rigikomeje.
Impamvu y’iyi mpanuka ntiragaragazwa nk’uko bivugwa n’abashinzwe iperereza bo mu Ishami rishinzwe impanuka z’indege mu Buhinde (AAIB), ndetse nta nama zirashyirwa ahagaragara.

Iperereza ry’ibanze ryagaragaje ko izo switches zari zavuye ku mwanya wa ‘run’ zerekeza kuri ‘cut-off’ hafi ako kanya, bigatuma indege itakaza imbaraga. Ntabwo higeze hasobanurwa uko byashobotse ko zishobora kwimuka ubwo indege yari imaze guhaguruka.
Icyakora FAA yavuze ko ibyo bibazo bitagomba guhabwa uburemere nk’ubw’icyemezo cya tekinike gitesha indege uburenganzira bwo kuguruka (Airworthiness Directive), kandi ko izakomeza gukorana n’ibigo mpuzamahanga mu gusangira amakuru ajyanye n’umutekano w’indege.

Mu majwi yafashwe mu cyumba cy’abapilote, umwe yumvikanye abaza mugenzi we impamvu yahagaritse lisansi. Undi yasubije ko atari we wabikoze.
Air India yavuze ko nta kibazo cy’imashini cyangwa imikorere cyigeze kiboneka mbere y’uko indege ihaguruka, kandi ko igenzura ry’indege zose zo mu bwoko bwa 787 ryahise rikorwa nyuma y’impanuka.
Indege ya Flight 171 yari iteganyijwe kuva i Ahmedabad mu Buhinde yerekeza ku kibuga cya Gatwick i Londres. Yahanutse igwa ku nyubako y’ishuri ry’ubuvuzi hafi y’icyo kibuga, ihitana abantu 260 – barimo 240 bari mu ndege na 20 bari hasi. Umwongereza umwe ni we warokotse.
Iperereza rirakomeje, kandi raporo irambuye iteganyijwe mu gihe cy’amezi 12 ari imbere.