Umunyarwandakazi Marie-Clémentine Dusabejambo yongeye gutera indi ntambwe ikomeye mu rugendo rwe rwa sinema, nyuma yo gusinyana amasezerano na Creative Artists Agency (CAA), kimwe mu bigo bikomeye bihagararira abahanga mu myidagaduro muri Hollywood.
Uyu mwanditsi akaba n’umuyobozi wa filime yabonye aya mahirwe nyuma y’uko filime ye ya mbere ndende, Ben’imana, yitwaye neza mu iserukiramuco rya sinema rya Cannes mu 2026.
CAA, ifite icyicaro i Los Angeles muri Leta Zunze Ubumwe za Amerika, ihagararira abakinnyi, abayobozi ba filime, abanditsi, abatunganya filime, abaririmbyi n’abandi banyamwuga bakomeye. Iki kigo gifasha abo gihagarariye kubona amasezerano, imishinga n’amahirwe yo gukorana n’ibigo bikomeye ku rwego mpuzamahanga.
Amasezerano mashya aje nyuma y’amateka Dusabejambo yanditse i Cannes, aho Ben’imana yegukanye igihembo cya Camera d’Or gihabwa filime ya mbere ndende yakozwe n’umuyobozi. Iyi filime yanahawe igihembo cya FIPRESCI mu cyiciro cya Un Certain Regard.
Ben’imana yakomeje kwitabwaho mu maserukiramuco akomeye arimo Toronto International Film Festival, BFI London Film Festival na AFI Fest. U Rwanda kandi rwatoranyije iyi filime nk’iyarusabye guhagararira mu rugendo rwo guhatanira igihembo cya Filime Mpuzamahanga Nziza muri Oscars.
Filime yakozwe mu gihe cy’imyaka 10, ihuza u Rwanda na Gabon ku bufatanye n’u Bufaransa na Norvège. Abagera kuri 90% by’abagize itsinda ryayikoze bakomoka mu Rwanda, bikaba byagaragaje ubushobozi bw’abakora sinema nyarwanda.
Dusabejambo yatangiye urugendo rwe muri sinema mu 2008. Mu 2010 yatsinze irushanwa ryo kwandika inkuru za filime ryateguwe na Tribeca Film Institute, bituma akora filime ye ya mbere ngufi yise Lyiza. Yakomeje gukora izindi filime zirimo A Place for Myself na Icyasha, zakwerekanwe mu maserukiramuco atandukanye.
Kwinjira muri CAA biha Marie-Clémentine Dusabejambo amahirwe mashya yo gukomeza kugeza inkuru z’Abanyarwanda ku isoko mpuzamahanga, mu gihe Ben’imana ikomeje kumenyekanisha sinema nyarwanda hirya no hino ku isi.

